A Xunta traslada desde o 31 de xullo a localización das paradas de autobús afectadas polo corte de tráfico na avenida Rodríguez de Viguri, de Santiago de Compostela
As obras no treito da avenida Rodríguez de Viguri, entre a rotonda superior e a situada á altura do Conservatorio Profesional de Música de Santiago, impiden o tráfico na zona.
Para garantir a prestación dos servizos de transporte público con normalidade mentres dure a obra, a Consellería de Infraestruturas e Mobilidade estableceu dúas zonas alternativas de parada dos autobuses.
Un dos novos puntos de parada situarase no inicio da rúa Monte dos Postes, a carón do Conservatorio, e o outro, no carril segregado da avenida do Camiño Francés que deixa de recibir o tráfico procedente da avenida Rodríguez de Viguri.
As liñas do transporte público de Galicia que prestan servizo nesta zona de Santiago de Compostela adaptarán o seu percorrido á localización temporal das paradas alternativas mentres se manteña o corte ao tráfico, que ten unha duración prevista ata finais de agosto.